Министерот за енергетика и природни ресурси на Турција, Алпарслан Бајрактар, ја претстави визијата за користење и развој на локалните енергетски ресурси, зголемување на ефикасноста и намалување на зависноста од енергетски извори надвор од границите на Турција.
„Турција работи на постигнување енергетска независност и голема трансформација во следните 30 години“, рече Бајрактар.
Тој посочи дека Анкара ќе се фокусира на развој на неколку извори на енергија за да ги задоволи нејзините национални потреби.
„Турција е земја чија побарувачка за енергија континуирано расте. Затоа, наш прв приоритет е да обезбедиме сигурност во снабдувањето на одржлив начин. Второ, за жал, како што знаете, Турција е зависна од надворешни извори за енергија“, рече Бајрактар.
Тој додаде дека оваа земја увезува 70 отсто од примарните извори на енергија.
„Денес Турција е 92 отсто зависна од странски земји кога станува збор за сурова нафта. Ние увезуваме 99 отсто природен гас“, додаде тој.
Тој посочи дека откритијата на подрачјето на планината Габар, како и пребарувањата во други области се многу вредни.
„Мораме да одговориме на растечката побарувачка и мораме да ја намалиме зависноста од надворешни извори“, рече Бајрактар, нагласувајќи дека тоа мора да се направи на најконкурентен можен начин, а во исто време да се фокусираме на користењето на локалните ресурси.
Друга цел е Турција да биде јаглеродно неутрална до 2053 година, повтори тој.
Бајрактар смета дека борбата против климатските промени не е само обврска на Министерството за енергетика, туку потребни се промени во сите области, вклучително и инвестиции, вработување и производство.
Турција има огромен ресурс и потенцијал во обновливите извори, нагласи тој, додавајќи дека обновливата енергија може да придонесе во повеќе области, вклучително и задоволување на растечката побарувачка за енергија на земјата, намалување на зависноста од странски извори и намалување на емисиите за нејзините цели за климатските промени.