Украина има намера да ги одложи плаќањата на надворешниот јавен долг – нејзините еврообврзници и каматите за нив – за 24 месеци, почнувајќи од 1 август. Ова е наведено во владината резолуција објавена денеска и цитирана од Ројтерс.
Владата во Киев, која се обидува да се справи со последиците од руската инвазија која започна на 24 февруари, му наложи на Министерството за финансии да преговара со доверителите до 15 август за одложување на плаќањата и да вети дополнителна камата за задоцнетите плаќања.
Властите исто така планираат да ги одложат плаќањата за хартии од вредност поврзани со бруто домашниот производ (БДП) од мај 2023 година до август 2024 година.
Во врска со финансиската состојба на Украина и, соодветно, нејзината способност да врши плаќања за нејзиниот надворешен долг, амбасадорот на ЕУ во Украина, Мати Маазикас, рече дека е малку веројатно земјата да не го плати својот надворешен долг, но ја нарече финансиската ситуација „страшна“.
„Немам такво претчувство. Мислам дека би разбрал доколку Украинците навистина беа на работ на банкрот. Но, ситуацијата е ужасна“, изјави Маазикас во интервју за „Еуроњуз“.
Според амбасадорот, надворешната финансиска помош за Украина не е доволна.
А неодамна, Олег Устенко, економски советник на Володимир Зеленски, рече дека Украина сега треба да добива 9 милијарди долари месечно од западните земји за да го покрие буџетскиот дефицит. Ова е речиси двојно повеќе од претходните барања на Киев, потсети Прајм.
