Внимателно тргување на Волстрит, само Nasdaq порасна

19

На Волстрит во понеделникот, берзанските индекси забележаа само мали движења, по силниот раст во петокот, бидејќи инвеститорите се склони кон ризик пред говорот на претседателот на ФЕД Џером Пауел и извештајот за инфлацијата во САД.
Dow Jones загуби 0,34 отсто, на 33.517 поени, додека S&P 500 се лизна за 0,08 отсто, на 3.892 поени. Индексот Nasdaq зајакна, пак, за 0,63 отсто, на 10.635 поени.

Во петокот, тие индекси скокнаа за повеќе од 2 отсто, бидејќи извештаите од американскиот пазар на труд и секторот за услуги ги поддржаа надежите дека американската централна банка може да биде помалку агресивна во зголемувањето на каматните стапки, со оглед на намалувањето на инфлаторните притисоци.

Но, на почетокот на оваа недела инвеститорите се претпазливи. Додуша, индексите го поминаа најголемиот дел од денот на позитивна територија, но кон крајот на тргувањето, Dow Jones и S&P 500 паднаа во негатива.

Инвеститорите не се склони да преземаат дополнителни ризици пред говорот на претседателот на ФЕД Џером Пауел во вторник на состанокот на централните банкари во Стокхолм.

Се очекува тој да повтори дека се потребни дополнителни мерки за сузбивање на инфлацијата.

На пазарот на пари се проценува дека челниците на ФЕД на состанокот во февруари ќе ги зголемат клучните каматни стапки за 0,25 процентни поени, а не за 0,50 поени, како што направија на последниот состанок минатата година.

Во четврток, пак, ќе биде објавен извештајот за потрошувачките цени во декември во САД, кој веројатно ќе покаже дека инфлаторните притисоци сè уште се намалуваат.

Дополнително, на крајот на неделата во САД започнува сезоната на објавување квартални деловни резултати на компаниите, што би можело значително да влијае на насоката на пазарот, со оглед на тоа што не се очекуваат посебни резултати поради високата инфлација и забавувањето на економскиот раст.

И на европските берзи вчера поскапеа акциите. Лондонски FTSE индекс зајакна 0,33 отсто, на 7.724 поени, додека франкфуртски DAX порасна за 1,25 отсто, на 14.792 поени, а париски CAC 0,68 отсто, на 6.907 поени.