Побарувачката за литиум е веќе „жешка“ поради рапидно растечкото производство на електрични возила што користат литиум-јонски батерии. Сепак, глобалниот недостиг на метал ветува тешки времиња за производителите.
Западните земји се борат да отворат нови рудници за да се натпреваруваат со доминантниот снабдувач, Кина. Но, во четвртокот, српската влада ги укина лиценците за голем проект за ископ на литиум во сопственост на англо-австралиската рударска компанија „Rio Tinto Plc“, објавија медиумите кај нашиот северен сосед. За автомобилската индустрија ова е сигнал дека дефицитот ќе се влоши во наредните години.
Литиумот во моментов се произведува со два методи. Во едната, металот се извлекува од тврди карпи. Овој метод главно го користат австралиските добавувачи. Аргентина, Чиле и Кина произведуваат литиум главно од солени езера.
Вкупното светско производство, мерено како еквивалент на литиум карбонат, ќе изнесува 485.000 тони до 2021 година, според прогнозите. Овој волумен ќе се зголеми на 615.000 тони во 2022 година и на 821.000 тони во 2023 година, според австралиското Министерство за индустрија.
Аналитичарите на Credit Suisse се поконзервативни, гледајќи производство во 2022 на 588.000 тони и 736.000 тони во 2023 година. Во секој случај, побарувачката за литиум најверојатно ќе биде поголема од понудата оваа или следната година.
Цените природно се очекува значително да пораснат. Главниот производител Allkem, еден од првите 10 во индустријата, рече оваа недела дека очекува цените да скокнат на околу 20.000 долари за тон до јуни, што е за околу 80 отсто повеќе од декември 2021 година.
