Во париското предградие Вилерс сур Марне наскоро ќе започне изградба на кула прекриена со зеленило којашто ја дизајнираше италијанската компанија Stefano Boeri Architetti.
Од надворешната страна ќе бидат насадени 2.000 дрва, растенија и грмушки, а внатре ќе има луксузни станови, деловен простор и продавници. Кулата наречена Forêt Blanche (Бела шума) ќе биде висока 54 метри, ќе има многу прозори со поглед на градот, а поголемиот дел од фасадата ќе биде изграден од дрво, пишува Business Insider.
Становите со тераси ќе се наоѓаат на повисоките катови, а под нив ќе бидат канцеларии и продавници.
Целта на проектот е да се создаде архитектонска структура којашто ќе служи во борба против климатските промени и зголемување на биоразновидноста во урбаните средини.
Архитектонската компанија којашто стои зад овој проект е позната по својот дизајн чијшто заштитен знак е зеленилото. Боери е познат по проектот Вертикална шума во Милано, а летово го претстави својот план за сличен проект во источниот кинески град Нанџинг.
Фото: Stefano Boeri Architetti
