Вчера се тргуваше внимателно на Волстрит бидејќи инвеститорите не сакаа да ризикуваат по објавувањето на записникот од неодамнешната седница на челниците на ФЕД, а во пресрет на објавувањето на кварталните деловни резултати на технолошкиот гигант Nvidia.
Dow Jones зајакна 0,13 отсто, на 38.612 поени, а S&P 500 порасна за исто толку, достигнувајќи 4.981 поени. Индексот Nasdaq ослабе, пак, за 0,32 отсто, на 15.580 поени.
На најголемата светска берза владееше претпазливост бидејќи записниците од состанокот на американската централна банка покажаа дека нејзините лидери се загрижени за ризиците што би се појавиле доколку прерано ги намалат каматните стапки и не се сигурни колку долго каматните стапки треба да останат покачени.
Цените на акциите на Волстрит неодамна се зголемија бидејќи инвеститорите се надеваат дека ФЕД агресивно ќе ги намали каматните стапки оваа година, почнувајќи од состанокот во март. Но, веќе никој не го ни спомнува март, а по вчерашното објавување на записникот, на пазарот преовладува мислењето дека намалувањето на каматите најверојатно нема да се случи пред јуни.
Акциите на Nvidia скокнаа
Вчера инвеститорите беа претпазливи и затоа што ги чекаа деловните резултати на Nvidia.
По затворањето на пазарот, производителот на чипови пријави подобри од очекуваните приходи и заработка во последниот квартал од минатата година, што доведе до зголемување на цената на акциите на Nvidia за повеќе од 6 отсто во продолженото тргување и надоместување на сите загуби од претходните денови.
Бидејќи цените на акциите на неколку други производители на чипови пораснаа, фјучерсите на S&P 500 и Nasdaq утрово пораснаа меѓу 0,7 и 1 отсто, што значи дека на почетокот на тргувањето на Волстрит во четврток, овие индекси би можеле да се зголемат.
Цените на акциите вчера пораснаа и на повеќето европски берзи. Лондонскиот FTSE индекс ослабе за 0,73 отсто, на 7.662 поени, но франкфуртски DAX зајакна 0,29 отсто, на 17.118 поени, а париски CAC 0,22 отсто, на 7.812 поени.
