На Волстрит, берзанските индекси пораснаа во вторникот, враќајќи ги загубите од претходниот ден, но тргувањето беше претпазливо бидејќи инвеститорите ги очекуваа новите податоци за инфлацијата и состанокот на претседавачот на ФЕД.
Dow Jones зајакна 0,03 отсто, на 33.573 поени, додека S&P 500 порасна за 0,24 отсто, на 4.283 поени, а индексот Nasdaq 0,36 отсто, на 13.276 поени.
Со вчерашниот раст индексите ги надоместија загубите од претходниот ден, но тргувањето беше претпазливо бидејќи немаше вести кои појасно би можеле да го насочат пазарот.
Инвеститорите не сакаат да преземаат ризици додека не видат нови вести за трендовите на инфлација во САД, кои би можеле да влијаат на одлуките на лидерите на американската централна банка на состанокот следната недела.
Аналитичарите во анкетата на Ројтерс проценуваат дека потрошувачките цени благо паднале на месечна основа во мај, но стапката на базичната инфлација најверојатно ќе остане покачена.
Инвеститорите се надеваат дека тоа би можело да го поттикне ФЕД да го паузира процесот на зголемување на стапката.
На пазарот на пари во моментов се проценува дека има 80 отсто шанси челниците на американската централна банка да ги остават каматните стапки непроменети на состанокот следната недела.
Сепак, бидејќи инфлацијата сè уште не се намалува доволно брзо, повеќето аналитичари веруваат дека ФЕД, по паузата во јуни, уште еднаш ќе ги зголеми каматните стапки во јули.
Вчера благо пораснаа и цените на акциите на европските берзи. Лондонски FTSE индекс зајакна 0,37 отсто, на 7.628 поени, додека франкфуртски DAX порасна за 0,18 отсто, на 15.992 поени, а париски CAC 0,11 отсто, на 7.209 поени.