Волстрит остро падна по три дена раст

29

Акциите остро паднаа на Волстрит во средата, по три дена добивки, бидејќи апетитот за ризик на инвеститорите се намали додека ги чекаа резултатите од конгресните избори и извештајот за инфлацијата во САД.
Dow Jones се лизна за 1,95 отсто, на 32.513 поени, додека S&P 500 потона за 2,08 отсто, на 3.748 поени, а индексот Nasdaq 2,48 отсто, на 10.353 поени.

Откако скокна за околу 3 отсто во претходните три дена, S&P 500 изгуби добар дел од тие добивки вчера.

Тоа е резултат на неизвесна конгресна трка. Конечните резултати сè уште не се познати, но засега е јасно дека демократите освоија повеќе, а републиканците помалку пратенички места од очекуваното, па отсуствуваше „црвениот бран“ републиканци, наречен така по бојата на нивната партија.

Пазарот се надеваше дека републиканците ќе освојат мнозинство во Претставничкиот дом, но и во Сенатот, бидејќи контролата на само еден дом на Конгресот ќе им даде моќ на републиканците да ја запрат законодавната агенда на претседателот Џо Бајден, што ќе одговара на пазарот на капитал во некои сегменти.

Победата на демократите, од друга страна, би предизвикала стравувања за дополнително регулирање на технолошкиот сектор, зголемување на даноците и зголемени буџетски трошоци, што може дополнително да ги зајакне инфлаторните притисоци.