На Волстрит во четвртокот индексот S&P 500 се лизна од рекордното ниво поради падот на цените на акциите на технолошките компании, додека, благодарение на растот на енергетскиот сектор, Dow Jones порасна.
Индексот Dow Jones зајакна 0,77 отсто, на 39.134 поени, но S&P 500 се лизна за 0,25 отсто, на 5.473 поени, а Nasdaq 0,79 отсто, на 17.721 поени.
На самиот почеток на вчерашното тргување продолжи повеќедневното поскапување на акциите на технолошките компании, па S&P 500 за прв пат во историјата се проби над нивото од 5.500 поени.
Но подоцна, акциите на технолошките гиганти паднаа, па така и S&P 500 и Nasdaq индексот се лизнаа од рекордните нивоа до крајот на денот.
Меѓу другото, цената на акцијата на Nvidia падна за 3,5 отсто.
Благодарение на еуфоријата во врска со развојот на вештачката интелигенција, цената на акциите на Nvidia скокна за повеќе од 170 отсто од почетокот на годината, па така пазарната вредност на компанијата надмина 3.200 милијарди долари.
Така, на почетокот на неделата тој производител на чипови стана најголемата светска компанија по пазарна капитализација, престигнувајќи го Мајкрософт.
И додека технолошкиот сектор вчера падна, цените на акциите во енергетскиот сектор пораснаа, благодарение на поскапувањето на нафтата во последните денови, за околу 1,9 отсто.
Токму затоа, меѓу другото, индексот Дау Џонс вчера порасна.
На европските берзи вчера поскапеа акциите. Лондонски FTSE индекс зајакна 0,82 отсто, на 8.272 поени, додека франкфуртски DAX порасна за 1,03 отсто, на 18.254 поени, а париски CAC 1,34 отсто, на 7.671 поени.