На Волстрит, берзанските индекси паднаа втор ден по ред, бидејќи цените на акциите на некои технолошки гиганти паднаа и додека инвеститорите останаа внимателни пред новите економски показатели и извештајот на претседателот на ФЕД Џером Пауел до Конгресот.
Dow Jones загуби 1,04 отсто, на 38.585 поени, додека S&P 500 се лизна за 1,02 отсто, на 5.078 поени, а индексот Nasdaq загуби 1,65 отсто, на 15.939 поени.
Притисок врз акциите
Падот на индексот втор ден по ред главно е резултат на притисокот врз акциите на неколку технолошки гиганти.
Цената на Apple падна по медиумските извештаи за пад на продажбата на iPhone во Кина, додека акциите на производителот на чипови Advanced Micro Devices паднаа по веста дека Вашингтон нема да дозволи продажба на чипови со вештачка интелигенција на кинески компании. Паднаа и цените на акциите на неколку други технолошки гиганти, што според аналитичарите е последица на повлекувањето на дел од заработката од пазарот, откако тој сектор бележи силен раст од почетокот на оваа година, иако минатата година веќе скокна за 56 отсто.
Инвеститорите се исто така претпазливи бидејќи надежите дека американската централна банка агресивно ќе ги намали каматните стапки оваа година избледеа.
Инфлацијата сè уште не се намалува доволно
Економијата на САД сè уште е прилично солидна, а инфлацијата не се намалува толку брзо како што се надеваа инвеститорите, па очекувањата за намалување на каматните стапки се поместени од март во јуни.
Денеска и утре во фокусот на инвеститорите ќе биде извештајот на претседателот на централната банка Пауел до Конгресот, а инвеститорите внимателно ќе ги следат неговите коментари во однос на инфлацијата, економските движења и можното намалување на каматните стапки.
Во петок, пак, ќе биде објавен американскиот извештај за вработување, кој вообичаено има значително влијание врз насоката на пазарот бидејќи покажува колку е силен пазарот на трудот и колку растат платите.
И на повеќето европски берзи цените на акциите вчера паднаа. Сепак, лондонскиот FTSE индекс зајакна за 0,08 отсто, на 7.646 поени, но франкфуртски DAX се лизна за 0,10 отсто, на 17.698 поени, а париски CAC 0,30 отсто, на 7.932 поени.
