На Волстрит, цените на акциите силно се зголемија во вторникот, бидејќи новите знаци за намалување на инфлациските притисоци во САД ги поддржаа надежите дека американската централна банка наскоро ќе го заврши циклусот на зголемување на каматните стапки.
Dow Jones се зголеми за 1,09 отсто, на 34.086 поени, додека S&P 500 скокна за 1,46 отсто, на 4.076 поени, а индексот Nasdaq порасна за 1,67 отсто, на 11.584 поени.
Индексите ги повратија сите загуби од претходниот ден
Така, индексите ги повратија сите загуби од претходниот ден, а цените на акциите пораснаа во сите 11 најважни сектори на S&P 500.
Ова најмногу се должи на податоците дека трошоците за работна сила пораснале со најниска стапка во една година во последниот квартал од минатата година, бидејќи растот на платите забави. Со ова се поткрепи тезата дека челниците на ФЕД ќе ги зголемат каматните стапки на овонеделната седница за само 0,25 процентни поени, а не за 0,50 поени, како на последната седница лани.
Одлуките на ФЕД ќе бидат објавени во среда, а по објавувањето, претседателот на банката Џером Пауел ќе одржи прес-конференција која би можела да им даде насоки на инвеститорите во однос на натамошниот развој на каматните стапки.
Инвеститорите се надеваат дека конечната каматна стапка, со која ФЕД ќе го запре циклусот на покачување, би можела да биде помала од 5 отсто, иако повеќето функционери на ФЕД изјавија дека каматните стапки ќе треба да се искачат над нивото од 5 отсто за да се спречи инфлацијата.
Заработката на компаниите од S&P 500 падна повеќе од очекуваното
Токму поради овие надежи цените на акциите силно пораснаа од почетокот на годината. Индексот S&P 500 во јануари порасна за 6,2 отсто, додека Nasdaq скокна за 10,7 отсто. Деновиве инвеститорите се фокусирани и на кварталните деловни резултати. Досега се објавени извештаи од повеќе од 150 компании од индексот S&P 500, од кои околу 68 отсто оствариле поголема добивка од очекуваното.
Сепак, аналитичарите анкетирани од Ројтерс проценуваат дека заработката на компаниите од индексот S&P 500 паднала за околу 3 отсто во четвртиот квартал од минатата година во споредба со истиот период претходната година, додека на почетокот се очекуваше пад на заработката од 1,6 отсто.
И на европските берзи вчера претпазливо се тргуваше. Лондонски FTSE индексот ослабе за 0,17 отсто, на 7.771 поен, додека франкфуртски DAX зајакна 0,01 отсто, на 15.128 поени, а париски CAC 0,01 отсто, на 7.082 поени.
Фото: Facebook
