На Волстрит вчера цените на акциите пораснаа четврти ден по ред, по објавувањето на записникот од последниот состанок на американската централна банка и извештајот за цените на производителите во САД во септември.
Dow Jones зајакна 0,19 отсто, на 33.804 поени, додека S&P 500 порасна за 0,43 отсто, на 4.376 поени, а индексот Nasdaq за 0,71 отсто, на 13.659 поени.
Порастот следеше четврти ден по ред по многу неизвесно тргување
Растот на индексот четврти ден по ред следеше по многу неизвесно тргување бидејќи извештајот за цените на производителите не покажа дека инфлацијата во САД значително се намалува.
Продажните цени во септември пораснаа за 0,5 отсто на месечно ниво, што е побавно од август кога растот беше 0,7 отсто, но поголем од очекувањата на аналитичарите од 0,3 отсто.
На годишно ниво, пак, продажните цени се зголемија за 2,2 отсто, што е највисоко од април.
„Инвеститорите ќе мора да бидат трпеливи“
„Извештајот сугерира дека сè уште не го гледаме крајот на покачената инфлација и каматните стапки. Инвеститорите ќе мора да бидат трпеливи. Значително намалување на инфлацијата од минатогодишниот врв е еден предизвик и намалувањето на инфлацијата на целното ниво на ФЕД. од 2 проценти е друго“, вели Мајк Ловенгарт, директор во глобалната инвестициска канцеларија на Морган Стенли.