На Волстрит, цените на акциите пораснаа во вторникот, бидејќи стравувањата за банкарскиот систем се намалија, а податоците за инфлацијата во САД се усогласија со очекувањата.
Dow Jones зајакна 1,06 отсто, на 32.155 поени, додека S&P 500 порасна за 1,68 отсто, на 3.920 поени, а Nasdaq индексот 2,14 отсто, на 11.428 поени.
По остриот пад од претходниот ден, во вторникот индексите пораснаа бидејќи се намали притисокот врз банкарскиот сектор, кој трае од крајот на минатата недела и колапсот на две банки.
Стравувањата од ширење на кризата во банкарскиот систем стивнаа откако властите на САД и низа други земји изјавија дека кризата ќе се спречи и дека нема причина за грижа за другите банки.
Благодарение на ова, индексот S&P 500 на банкарскиот сектор вчера порасна за 2,6 отсто, откако претходниот ден потона за 7 отсто.
„Стравовите се ублажуваат“
„Пазарот можеше неколку дена да ги анализира вестите и пораките од голем број регулатори и агенции за безбедноста на банкарскиот систем, така што стравовите малку стивнаа“, вели Метју Китор, партнер во групата Keator.
Инвеститорите беа охрабрени и од податоците за инфлацијата, кои се во согласност со очекувањата на аналитичарите. Во февруари потрошувачките цени во САД пораснале за 0,4 отсто на месечно ниво, а за 6 отсто на годишно ниво.
Ова укажува на постепено намалување на инфлаторните притисоци, а зајакнаа шпекулациите дека ФЕД ќе го забави темпото на зголемување на каматните стапки.
Уште минатата недела се очекуваше дека ФЕД ќе ги зголеми каматните стапки за агресивни 0,50 процентни поени на состанокот во март.
Цените на акциите вчера пораснаа и на европските берзи. Лондонски FTSE индекс зајакна 1,17 отсто, на 7.637 поени, додека франкфуртски DAX порасна за 1,83 отсто, на 15.232 поени, а париски CAC за 1,86 отсто, на 7.141 поен.
