На Волстрит берзанските индекси пораснаа, но по нестабилното тргување, а инвеститорите се фокусираа на акциите на технолошките гиганти Nvidia и Alphabet.
Dow Jones зајакна 1,06 отсто, на 43.870 поени, додека S&P 500 порасна за 0,53 отсто, на 5.948 поени, а индексот Nasdaq 0,03 отсто, на 18.972 поени.
Инвеститорите беа фокусирани на кварталниот деловен извештај на Nvidia. Нето профитот на производителот на чипови достигна 19,3 милијарди долари во третиот квартал, двојно повеќе од истиот квартал минатата година. Приходите на Nvidia, пак, скокнаа за 94 отсто на годишно ниво, на 35 милијарди долари.
Резултати подобри од очекувањата на аналитичарите
Иако резултатите се подобри од очекувањата на аналитичарите, акциите на компанијата беа под притисок во текот на денот, па нејзината цена беше во минус за повеќе од 2 отсто.
Сепак, тргувањето на Волстрит заврши со добивка од 0,5 отсто.
Од друга страна, акцијата на Alphabet вчера беше меѓу најголемите губитници, со пад на цената од над 4,5 отсто.
Тоа следи по аргументот на американското Министерство за правда пред судот дека Google мора да го продаде својот прелистувач Chrome и да преземе други мерки за да го прекине својот монопол над онлајн пребарувањето.
Вчера пораснаа и индексите на европските берзи. Лондонски FTSE зајакна 0,79 отсто, на 8.149 поени, додека франкфуртски DAX порасна за 0,74 отсто, на 19.146 поени, а париски CAC 0,21 отсто, на 7.213 поени.
