Волстрит порасна, компаниите заработија повеќе од очекуваното

10

На Волстрит берзанските индекси пораснаа и со тоа надоместија дел од загубите од претходниот ден, но тргувањето беше претпазливо бидејќи надежите за намалување на каматите во март целосно стивнаа.

Dow Jones зајакна 0,37 отсто, на 38.521 поени, додека S&P 500 порасна за 0,23 отсто, на 4.954 поени, а индексот Nasdaq за 0,07 отсто, на 15.609 поени. Во текот на целиот период на тргување, индексите наизменично се менуваа помеѓу позитивна и негативна територија, а дури кон крајот на периодот на тргување забележаа благ пораст.

Внимателни инвеститори
Инвеститорите се претпазливи бидејќи шпекулациите за намалување на каматните стапки во март стивнаа откако претседателот на ФЕД Џером Пауел во неделата изјави дека централната банка најверојатно ќе ги намали каматните стапки со многу побавно темпо отколку што очекува пазарот.

Вчера инвеститорите беа фокусирани на коментарите на уште неколку функционери на ФЕД и сите, секој на свој начин, го кажаа истото – инфлацијата сè уште е над целните нивоа на ФЕД, па затоа е рано за намалување на каматните стапки.

„Неколку претставници на ФЕД го потврдија она што Пауел го кажа во неделата и тоа изврши одреден притисок врз пазарот“, рече Питер Туз, претседател на инвестицискиот совет на Чејс. Од друга страна, пазарот е поддржан со добри квартални деловни резултати на компаниите.

Заработка поголема од очекуваната
Досега повеќе од половина од компаниите од индексот S&P 500 пријавиле за своето работење во последниот квартал од минатата година, при што околу 81 отсто од нив ги надминале очекувањата на аналитичарите во однос на заработката.

Според тоа, сега се проценува дека во тој квартал заработката на компанијата е зголемена за 8,1 отсто, додека пред еден месец се очекуваше раст од 4,7 отсто.

Цените на акциите вчера пораснаа и на европските берзи. Лондонски FTSE индекс зајакна 0,90 отсто, на 7.681 поен, додека франкфуртски DAX порасна за 0,76 отсто, на 17.033 поени, а париски CAC 0,65 отсто, на 7.638 поени.