Цените на акциите пораснаа на Волстрит во понеделникот бидејќи забавувањето на економскиот раст на САД најавува намалување на инфлаторните притисоци, што значи дека циклусот на зголемување на каматните стапки на ФЕД доаѓа до крајот.
Dow Jones зајакна 1,34 отсто, на 31.499 поени, додека S&P 500 порасна за 1,19 отсто, на 3.797 поени, а Nasdaq индексот за 0,86 отсто, на 10.952 поени.
Најновите макроекономски податоци покажуваат дека растот на најголемата светска економија забавува, што значи дека наскоро треба да се намалат инфлаторните притисоци.
А тоа, пак, покажува дека напорите на американската централна банка даваат резултати.
„Податоците покажуваат дека економијата забавува и дека она што го прави ФЕД се исплати. Банката на федерални резерви се приближува до својата цел и ние влегуваме во последната фаза од циклусот на зголемување на каматните стапки“, вели Питер Туз, претседател на инвестицискиот совет на Чејс.
Сепак се проценува дека ФЕД повторно ќе ги зголеми клучните каматни стапки за агресивни 0,75 процентни поени на седницата на почетокот на ноември, четврта сесија по ред.
Но, во декември зголемувањето би можело да биде поблаго.
Пазарот е поддржан и од солидните деловни резултати на компаниите и банките. Од компаниите од индексот S&P 500, кои досега објавуваа квартални извештаи, околу 74 отсто од нив ги надминаа очекувањата во однос на заработката.
Tоа е благодарение на намалените очекувања, бидејќи аналитичарите ги намалија проценките во последните месеци поради високата инфлација, зголемувањето на каматните стапки и забавувањето на економскиот раст.
Така, аналитичарите во истражувањето на Ројтерс сега проценуваат дека заработката на компаниите од индексот S&P 500 се зголемила за 3 отсто во третиот квартал во однос на истиот период минатата година.
На почетокот на јули очекуваа зголемување на платите за повеќе од 11 отсто, а на почетокот на октомври 4,5 отсто.
Цените на акциите вчера пораснаа и на европските берзи. Лондонски FTSE индекс зајакна за 0,63 отсто, на 7.013 поени, додека франкфуртски DAX скокна за 1,58 отсто, на 12.931 поен, а париски CAC 1,59 отсто, на 6.131 поен.
