За 2.300 евра по квадрат во Сплит не можете да купите ништо бидејќи тој град има убедливо најскапи недвижнини меѓу четирите најголеми хрватски градови.
Во Сплит речиси и да нема новоградби, а цената за квадрат во центар не паѓа под 3.000 евра. Иако од ЕУ доаѓаат предупредувања дека поскапувањето е поради мешање на државата, од АPN (Агенција за правен промет и посредување со недвижности) потврдуваат дека пристигнуваат нови 50 милиони куни субвенции, пренесува Дневник.хр.
Во потрага по идеален стан, едно семејство од Сплит се согласило на компромиси. „Се плашевме колку ќе продолжат да растат цените. Сега купивме стан кој чини 2.300 евра квадрат. Сепак, треба уште да се реновира и да се инвестира барем уште дваесет илјади евра“, изјави жителка на Сплит.
Директорот на агенцијата за недвижности Марин Билисков изјави: „Не зборуваме за нова градба, туку за станови кои бараат реновирање, многу е тешко да се купи стан за помалку од 3.000 евра.
Наместо очекуваната криза поради пандемијата, пазарот никогаш не е пожив.
„Со оглед на тоа што се појавија голем број странци, тоа секако предизвика зголемување на цената. Просечната цена на недвижностите се зголеми за десетина проценти во однос на 2020 година. Се разбира, тоа предизвика и ниски каматни стапки“, рече Јоже Томаш од Хрватската стопанска комора на Сплитската жупаниска комора.
Од Брисел има забелешка дека мешањето на државата довело до ново поскапување.
И покрај предупредувањата, од АPN потврдија дека допрва започнува нова рунда субвенции. Први интерес пројавуваат банките, а граѓаните ќе имаат ред на крајот на март. На располагање се 50 милиони куни (околу 6,7 милиони евра), сума доволна за околу 4.500 барања.