Холандскиот добавувач на опрема за производство на компјутерски чипови ASML објави остар пад на побарувачката во првиот квартал, што се должи на холандската забрана за извоз на најсофистицираните машини во Кина според договорот со САД.
Вредноста на нарачките за најновата генерација машини (EUV) падна на само 656 милиони евра, од 1,6 милијарди евра во истиот период лани. Нето добивката на ASML е намалена за 40,5 отсто, на 1,22 милијарди евра, а приходите за 27 отсто, на 5,29 милијарди евра. Побарувачката за најновата генерација на машини ASML, објаснува Хина, остро ослабе откако владата во Хаг го забрани нивниот извоз во Кина, придружувајќи им се на САД во обидот да го поткопа кинескиот развој на капацитетот за производство на чипови, наведувајќи загриженост за националната безбедност. Кина со години се обидува да ја намали својата зависност од увоз на чипови, па компаниите купуваат постари ASML машини на големо што не подлежат на забраната, користејќи ги за производство на чипови за стоки за широка потрошувачка, вклучувајќи фрижидери, автомобили, играчки и мобилни телефони. Во такви услови, продажбата на ASML на системи за литографија на кинески клиенти изнесуваше рекордна речиси половина од приходите во првиот квартал, достигнувајќи околу две милијарди евра, објави компанијата.
Кина сочинуваше 29 отсто од приходите на ASML минатата година, делумно поради тоа што компаниите набавуваа машини од средна класа пред да бидат воведени новите извозни ограничувања на почетокот на 2024 година. Во 2025 година, ASML смета дека побарувачката за нови машини треба да закрепне благодарение на порастот на вештачката интелигенција и зголеменото производство на мемориски чипови.
