Цената на златото на светскиот пазар достигна нов рекорд, што обично се случува кога инвеститорите се исплашени и бараат ново засолниште. Од друга страна, берзите се на рекордни нивоа во исто време, што обично е знак на оптимизам.
Ретко е и цената на златото и берзанските индекси да бидат на рекордни нивоа во исто време. Имено, цената на унца злато е 3.757 долари, додека берзанскиот индекс S&P 500 затвори минатиот петок со добивка од 0,49 проценти, што е рекорд на сите времиња. Хенри Ален од Дојче Банк посочи дека инвеститорите се оптимисти во врска со акциите, но се плашат од високиот ризик од нивен пад.
Тој потсети дека цената на златото овој месец е повисока од претходниот рекорд од јануари 1980 година, кога имаше инфлација. Тоа беше времето кога Соединетите Американски Држави, како што рече, се лизгаа во рецесија со зголемување на каматните стапки со цел да ја ограничат инфлацијата. Значи, како што додава Ален, високата цена на златото во минатото не беше поврзана со прекумерен оптимизам. Тој посочи од што конкретно се плашат инвеститорите.
„Во следните неколку години, стапката на инфлација во САД ќе остане над целната стапка, што е далеку од совршено. Ова е поврзано со долгорочни стравувања од царини, и останува да се види што ќе се случи во одредени сектори, како што се фармацевтската индустрија и полупроводничкиот сектор. Пазарот очекува дека „затворањето“ на американската влада е сè поверојатно на крајот од месецот. Исто така, постои загриженост за забавување на бројот на вработени“, нагласи тој.
Значи, во реалноста постојат многу ризици, но со многу простор за нивно позитивно решавање.
Понатаму, многу се зборува за тоа дека акциите на вештачка интелигенција (ВИ) се во меур, слично на она што се случи со компаниите базирани на интернет кон крајот на 20-тиот и почетокот на 21-виот век. Пред да пукне тој меур, цената на златото падна бидејќи инвеститорите беа премногу оптимисти за технолошките акции.
Но, според зборовите на Ален, клучната разлика во споредба со тој период е што цената на златото тогаш беше многу ниска, додека сега е на рекордно високо ниво, пишува бизнис весникот Fortune.