Поради пандемијата на Ковид-19 не мора секојдневно да патувате на работа и да ручате со колегите од канцеларија, а почетокот и крајот на работното време, се чини, дека не постојат повеќе.
Голем број вработени кои поради пандемијата работат од дома ги мачи прашањето кога да направат пауза или да се одјават на крајот од работниот ден.
Неодамнешно истражување на Националното биро за економски истражувања на САД (НБЕР) покажа дека просечниот работен ден во светот станал подолг за 48,5 минути отколку пред пандемијата. Студијата се обиде да истражи како се менувале деловните електронски пораки и моделот на состаноци за само два месеци откако властите на САД воведоа карантин во 16 градови.
Д-р Александра Соломон, професор и лиценциран психолог на Институтот за семејна психологија на Универзитетот Нортвестерн во Еванстон, Илиноис, истакна дека лицата во таква стресна средина можат да го доживеат работниот ден подолго отколку што е објективно.
“Мислам дека поинаку го доживуваме времето. Дури и ако работното време објективно трае исто, се чувствува како да работиме повеќе“, вели Соломон.
На сите оние чии домови станаа и нивните канцеларии, таа им понуди совети што може да им помогнат да ги разделат деловниот и семејниот живот што е можно поефикасно.
Одржувајте рутина
Пред пандемијата, повеќето луѓе уживаа во вообичаената шолја кафе пред првиот работен состанок или утринското вежбање. Жаклин Јенсен, вонреден професор на Бизнис колеџот Дриехаус на Универзитетот ДеПол, ве советува да ги следите истите навики иако повеќе не патувате во канцеларија.
“И покрај тоа што повеќе не морате да патувате на работа, земете го тоа време како пауза додека не започнете со работа. Ако вашето вообичаено утринско кафе, вежбање или читање вести ви помага да се подготвите за работа, продолжете со истата активност затоа што без сомнение ќе имате корист од тоа“, вели Јенсен.
Комуницирајте со вашиот шеф и колеги
Студија на НБЕР открива дека сите оние кои работат од дома имаат почести, но пократки состаноци и добиваат повеќе електронска пошта, особено по работното време. Јенсен верува дека ова е затоа што луѓето ја пропуштаат нивната секојдневна интеракција со колегите и соработниците.
“Во ходникот нема повремена средба и краток неформален разговор, така што додека работите од дома, може да најдете време да закажете разговор преку Zoom“, смета таа.
Шефовите можат да предвидат повеќе време за разговор. Јенсен верува дека отворената линија на комуникација за очекувањата и роковите може да намали дел од притисокот што произлегува од мислата дека работата треба да се заврши веднаш, особено ако некое лице дома е соочено со низа работи што му го одвлекуваат вниманието.
“Ако вработен дома балансира меѓу многу поголем број обврски, можеби нема да биде важно толку многу дали ќе ја завршат работата до седум часот наутро или до 19 часот“, вели Јенсен.
Искрено кажете колку работа можете да издржите
Кога работите со колеги виртуелно, важно е искрено да кажете кога сте преморени затоа што комбинацијата од работата што треба да ја направите и работните обврски дома може да бидат многу стресни истовремено.
“Мислам дека во овој случај, навистина е важно да се грижите за себе. Проценете ги сопствените капацитети, а потоа бидете нежни кон себе и не двоумете се да кажете: Слушајте, не е реално да ја завршите целата оваа работа за еден ден“, додава Соломон.
Одвојте време за себе
За некои луѓе, работата од дома може да биде реакција на тоа колку сите се чувствуваме ранливи и несигурни за време на пандемија. Соломон вели дека многумина се обидуваат да избегаат од негативните мисли преку работа, пренесува МИА.
Ќе добиете поголема контрола над вашиот живот поставувајќи граници за себе, вели Соломон. Поставете паузи во текот на денот, медитирајте, одвојте време да разговарате со пријателите преку мобилен телефон или порака и не дозволувајте работата да ви го одземе приватниот дел од животот, е нејзиниот совет.
Фото: Freepik
