Германскиот гигант Volkswagen тивко и без многу помпа ги покажа новите Variant и Alltrack верзии на Golf.
Опсегот на осмата генерација на Volkswagen Golf продолжува да се проширува. Покрај стандардниот хечбек, сега тука се Volkswagen Golf Variant и Alltrack моделите кои официјално го забележаа своето деби.
Во споредба со Golf Variant моделот во заминување, новата верзија е 4,63 метри долга и има меѓуосовинско растојание од 2,68 метри, што значи дека автомобилот е подолг од претходно. Тоа резултира со поголем простор за нозете, а исто така зголемен е и капацитетот на багажникот од 605 на 611 литри. Просторот се зголемува до 1.642 литри кога задната клупа е преклопена.
Volkswagen Golf 8 Variant ќе се нуди со истиот опсег на мотори кои се достапни во хечбек верзијата, што значи голем избор на бензински и дизел погони во опсег од 110 до 150 КС. Новиот Golf R Variant е се уште во изработка и ќе пристигне со 2,0-литарски турбо четирицилиндричен мотор и погон на сите четири тркала.
Од друга страна, тука е и Volkswagen Golf Alltrack, кој пристигнува со слична форма како Variant, но, секако, има поголем клиренс и пристигнува како стандард со 4Motion систем за погон на сите четири тркала. Golf Alltrack исто така пристигнува со пластични прекривки на каросеријата со цел да се добие посуров и поостар изглед. Малку промени се направени и во ентериерот на Alltrack, но се одликува и со карактеристичен вез на задниот дел од седиштата.
Неколку различни моторни опции се нудат и за Golf Alltrack, а максималниот влечен капацитет на автомобилот е 2.000 килограми.
Продажбата на новиот Golf Variant и Alltrack ќе стартува кон крајот на 2020 годината, додека надвор од Европа ќе се појави во 2021. Цените ќе бидат објавени кога ќе се наближи датумот за продажба.
Преземено од Avtoplus.mk
