На натпреварот Les Citadelles du Vin 2013 што се одржа во Бордо, Франција, вината на винарската визба Тиквеш добија уште една потврда за својот квалитет. Црвеното вино Барово од бербата 2011-та освои уште едно злато, а белите вина Ркацители Special Selection и Бела Вода од бербата 2012-та освоија сребрени медали.
На годинашното 13-то издание на овој реномиран вински натпревар се оценуваа 1.159 различни вина од 29 земји од светот. Вината беа оценувани од 60 експерти-дегустатори кои доделија вкупно 133 златни и 208 сребрени медали, во најголем дел на вината произведени во познатите вински земји како Франција, Шпанија, Италија, Австралија, Чиле …
“Нашето Барово е единственото вино од Македонија и регионот кое е наградено со златен медал на овој реномиран натпревар. Тоа е уште една потврда дека и ние во Македонија знаеме и можеме да произведеме вино со врвен квалитет, достојно да биде „рамо до рамо“ со светската винска елита”, изјави Игор Илиевски, генерален директор на ВВ Тиквеш.
Од почетокот на 2013-та година, на девет значајни вински натпревари, винарницата Тиквеш освои 42 медали и специјални признанија за квалитетот на своите врвни вина, стои во соопштението.
