Најголемата светска хемиска компанија „BASF“ има намера да укине 2.600 работни места ширум светот. Околу две третини од нив ќе бидат во Германија, соопшти во петокот производителот на листата на „DAX“.
Минатата година „BASF“ објави програма за штедење поради големиот пораст на трошоците за енергија во Европа и забавувањето на економијата, објави „Handelsblatt“.
Компанијата планира да заштеди 500 милиони евра годишно надвор од производството од 2024-та година наваму, од кои половина ќе бидат реализирани во главната фабрика во Лудвигсхафен. Таму работат околу 39.000 од вкупно 111.500 вработени во концернот. Фокусот на заштедите ќе бидат во областите на услуги, корпоративни и истражувачки активности, како и во седиштето на групацијата.
„Конкурентноста на европскиот регион се повеќе страда од прекумерна регулација“, рече извршниот директор на компанијата Мартин Брудермилер, цитиран во соопштението за печатот на компанијата.
Сето ова веќе многу години го забавува растот на пазарот во Европа во споредба со другите региони. Згора на тоа, високите цени на енергијата веќе имаат влијание врз профитабилноста и конкурентноста во Европа.
Приспособувањето во Лудвигсхафен се очекува да ги намали фиксните трошоци за повеќе од 200 милиони евра годишно од крајот на 2026-та година, објави „BASF“. Покрај програмата за намалување на трошоците, германската компанија презема и структурни мерки.
„Целта е подобро да се подготви главната фабрика во Лудвигсхафен за се пожестоката конкуренција на долг рок. Меѓу другото, ќе биде затворена една од двете погони за амонијак, како и погоните за некои прекурсори и суровини“, велат од компанијата.
„BASF“ прогнозираше помал оперативен профит оваа година, очекувајќи приспособена заработка пред камати и даноци на 5,4 милијарди евра, откако добивката падна за 12 отсто на 6,9 милијарди евра во 2022-ра година. И покрај предизвиците, компанијата ја задржа дивидендата непроменета на 3,40 евра по акција и очекува подобро второ полугодие во однос на првото, предводено од закрепнувањето особено во Кина, пренесува „Bloomberg“.
Компанијата, исто така, доби неколку удари од руската инвазија на Украина, која ги откри децениските врски со Русија како погрешен облог. „BASF“ помогна во финансирањето на изградбата на двата гасоводи Северен тек преку нејзината подружница „Wintershall Dea“. Прекинувањето на врските со претпријатието во јануари доведе до отпишување од 7,3 милијарди евра и историска загуба за „BASF“, кој исто така работеше со заеднички вложувања со „Газпром“ и други.
Постојаното зголемување на цените на гасот ризикува илјадници работни места и инвестиции да се префрлат на друго место. Истражувањето на германското хемиско здружение „VCI“ од крајот на јануари покажа дека речиси половина од хемиските компании планираат да ги намалат своите инвестиции во Германија оваа година поради трошоците за енергија.
Хемискиот сектор во Германија е особено зависен од гасот, генерирајќи околу 15% од вкупната годишна потрошувачка на гориво во земјата пред војната. Голем број компании, вклучувајќи ги „BASF“ и „Evonik Industries AG“, користат природен гас за производство на топлина и како суровина од која се произведуваат други хемиски производи, што ја прави индустријата составен дел од автомобилската и другите синџири на снабдување.
Фото: Pixabay
