„Луксузните акции“ добија удар во Европа минатата недела, откако Шанел предупреди дека индустријата е подготвена за потешки времиња, а аналитичарите велат дека гледаат зголемен притисок врз профитните маржи на ексклузивниот бренд.
Индексот Euro Stoxx Luxury 10 падна за цели 1,9 отсто, најмногу за околу еден месец, откако Шанел ги објави финансиските резултати за 2023 година. Додека добро познатата куќа за мода, козметика и накит забележа двоцифрен раст на продажбата и профитот, вниманието е насочено кон предупредувачкиот тон за бизнисот во перспектива.
„После три години исклучителен раст во нашата индустрија, сега влегуваме во попредизвикувачко опкружување“, рече Филип Блондија, финансиски директор на Шанел.
Луксузните акции оваа година беа нестабилни, со предупредувања од различни компании. Kering SA ги загрижи инвеститорите коментирајќи дека потрошувачите треба двапати да размислат пред да трошат. Постпандемиското закрепнување на клучниот кинески пазар се поколеба.
Во истиот период, Hermès International ослабе за цели 4,3 отсто, додека Kering падна за 2,4 отсто, LVMH Moet Hennessy Louis Vuitton SA за 2,1 отсто, а Richemont за 1,9 отсто.
Спротивно на тоа, акциите на производителот на козметика L’Oreal SA се зголемија за 1,7 отсто, бидејќи Шанел соопшти дека нејзиниот оддел за мириси и убавина забележа „многу силен раст“ во сите категории.
