Инвеститорот Џаред Кушнер, зет на Доналд Трамп, има големи планови за изградба на луксузни одморалишта во заштитените подрачја на Албанија.
Кушнер веќе ја има поддршката од албанскиот премиер Еди Рама, кој сака да донесе туристи од „висок профил“ во неговата земја, но невладините организации, еколозите и групите за заштита на природата предупредуваат дека изградбата ќе опустоши еден од последните диви крајбрежни екосистеми во Медитеранот, пишува „Јутарњи лист“.
Кушнер планира два проекта во Албанија, еден на островот Сазан, а другиот во областа Звернец, на југот на земјата. Според претходните пишувања на Њујорк Тајмс и Блумберг, Џаред Кушнер и неговата сопруга Иванка Трамп, преку нивната инвестициска компанија Affinity Partners, ќе инвестираат околу една милијарда долари за да го трансформираат островот Сазан, кој некогаш се користел како воена база, во луксузно одморалиште. Тоа е дел од националниот морски парк Карабурун-Сазан, едно од најголемите морски заштитени подрачја во Медитеранот и клучно место за размножување на загрозената медитеранска крзнена фока.
Друг проект што Кушнер го планира е уште попроблематичен. Како што пишува „Вашингтон пост“, изградбата на неколку одморалишта со околу 10.000 хотелски соби и вили во областа Звернец ќе го загрози едно од најважните живеалишта во Европа, познато по својата биолошка разновидност. Во овие песочни дини живеат желки, а лагуната Нарта служи како прибежиште за фламинго, пеликани и многу други заштитени морски птици.
Областа планирана за изградба е приближно 12 километри јужно од устието на реката Вјоса. Рендерите и 3Д визуелизациите објавени од Кушнер на социјалните мрежи откриваат дека тој сака да изгради комплекс вили овде по моделот на замокот на Трамп во Мар-а-Лаго, ексклузивни одморалишта со закривени ѕидови како бранови, огромни базени, како и докови за луксузни јахти. Локалниот агент за недвижности Флори Брахимај изјави за Ројтерс дека цените на становите со поглед на планираната локација веќе скокнале на меѓу 100 и 200 евра за метар квадратен.
Кушнер почнал да размислува за проекти во Албанија уште во 2021 година, кога еден пријател му препорачал да ја посети земјата. Тој го следел неговиот совет и веќе го запознал Рама за време на првото патување. Сепак, како што објасни во интервју за „Вашингтон пост“, со албанскиот премиер во таа прилика не разговарал за конкретни бизнис планови, туку го забележал огромниот туристички потенцијал на земјата. После тоа, тој ја посети Албанија уште неколку пати и пешачеше на дел од медитеранскиот брег со недопрени песочни дини и плажи обложени со карпи. Тој беше особено воодушевен од крајбрежната област Звернец, која ја опиша како „прекрасно платно“ за неговите соништа за развој на луксузни проекти.
„Тоа е место каде луѓето би сакале да бидат“, рече зетот на Трамп. Потоа го испрати својот деловен партнер и извршен директор на Affinity Global Development, Ашер Абехсер, да ја испита ситуацијата на терен. Абехсер се сретнал со Рама, кој наводно му рекол дека ако може „да развие нешто многу посебно“, тој е со „отворен ум“.
Можноста за развој на Сазан и Звернец најпрво ја покрена Кастрати Груп, пишува WaPo, која доминира во неколку клучни индустрии во Албанија, вклучувајќи ја и нафтената индустрија. „Кастрати груп потенцијално би можел да биде наш локален градежен партнер на терен“, рече Абехсер, додавајќи дека проектот ќе вработи неколку илјади луѓе, како во градежништвото, така и во работните места во хотели и вили.
