Вчера на Волстрит се тргуваше внимателно пред одлуките и пораките на првиот човек на американската централна банка, па берзанските индекси останаа речиси непроменети.
Dow Jones загуби 0,04 отсто, на 41.606 поени, додека S&P 500 зајакна 0,03 отсто, на 5.634 поени, а Nasdaq индексот зајакна 0,20 отсто, на 17.628 поени.
На почетокот на вчерашното тргување, Dow Jones и S&P 500 достигнаа рекордно високо ниво бидејќи инвеститорите беа охрабрени од неочекуваниот раст на продажбата на мало во САД во август, што покажува дека потрошувачката, најголемиот двигател на економијата, останува силна.
Сепак, до крајот на тргувањето, индексите загубија најголем дел од нивните првични добивки бидејќи на пазарот преовладуваше внимателност.
Вчера започна дводневната седница на челниците на ФЕД, а одлуките ќе бидат објавени во среда. Сосема е сигурно дека ФЕД ќе ги намали каматните стапки, првпат по неколку години рестриктивна монетарна политика, но големо прашање е дали ќе ги намали за 0,25 или 0,50 процентни поени.
До неодамна, пазарот очекуваше намалување од 0,25 процентни поени, со оглед на тоа што инфлацијата во САД не се намалува толку брзо како што се очекуваше.
Сепак, во последните денови имаше информации дека некои од лидерите на ФЕД се за поостро намалување од 0,50 процентни поени и дека исходот од седницата е неизвесен.
„По првичниот раст, пазарот се смири, а индексите се лизнаа од рекордно ниво бидејќи утре по состанокот на ФЕД некој ќе биде разочаран“, вели Расел Прајс, економист во Ameriprise Financial Services.
И на европските берзи вчера поскапеа акциите. Лондонски FTSE индекс зајакна 0,38 отсто, на 8309 поени, додека франкфуртски DAX порасна за 0,50 отсто, на 18.726 поени, а париски CAC 0,51 отсто, на 7487 поени.
