Американските акции пораснаа откако претседателот Доналд Трамп се согласи во текот на викендот да ги одложи царините од 50 проценти за увоз од Европската Унија.
Така, по отворањето на американските берзи, индексот Дау Џонс доби 489 поени или 1,2 проценти од својата вредност, S&P 500 доби околу 1,5 проценти, а Nasdaq доби 2,0 проценти, објави CNBC.
Трамп во неделата изјави дека ќе го продолжи рокот за воведување царини од 50 проценти за стоки увезени од Европската Унија до 9 јули, на барање на претседателката на Европската комисија, Урсула фон дер Лајен.
Покрај тоа, податоците за индексот на доверба на потрошувачите во американската економија за мај беа подобри од очекуваните поради надежта за склучување трговски договори меѓу Соединетите Американски Држави и други земји.
Акциите на „Тесла“ пораснаа за 4 проценти откако извршниот директор Илон Маск изјави дека го префрла фокусот од политиката на своите компании.
Технолошките компании, исто така, остварија добивка во пазарната вредност, предводени од Nvidia, AMD, Apple и Microsoft.