Министерството за финансии на Соединетите Американски Држави (САД) по шести пат ја одложи примената на санкциите врз Нафтената индустрија на Србија (НИС), овој пат до 26 септември.
Министерката за рударство и енергетика Дубравка Ѓедовиќ Хандановиќ истакна дека „НИС ќе продолжи да обезбедува стабилно снабдување со нафта и нафтени деривати на домашниот пазар дури и во тешки околности“.
„Крајната цел е да се отстрани НИС од листата на санкции на Канцеларијата за контрола на странски средства (OFAC) при Министерството за финансии на САД, што е процес кој не зависи од Србија. Се надеваме дека продолжувањето на разговорите на високо ниво меѓу САД и Русија ќе придонесе за напредокот на целиот пакет американски санкции против руските компании, како и за договор што би можел да има позитивен ефект врз отстранувањето на неизвесноста во врска со српската нафтена индустрија и отстранувањето на компанијата од листата на санкции“, истакна Ѓедовиќ Хандановиќ.
Таа истакна дека Србија успеала да ја зачува енергетската безбедност со одложување на санкциите досега.
„И покрај сложените околности на кои не можеме да влијаеме, беше обезбедено дека рафинеријата има доволно сурова нафта и продолжува да работи, и ние сме благодарни на американската администрација за нејзиното разбирање досега. Ситуацијата останува сложена и државата продолжува да вложува максимални напори и да води активен дијалог и со американската и со руската страна“, нагласи надлежната министерка.
Таа, исто така, потсети дека Србија на никаков начин не придонела за воведување санкции против НИС и дека тие се резултат на глобалната политика.
„Ќе продолжиме да се бориме со сите дипломатски средства за да обезбедиме стабилност на снабдувањето за нашите граѓани и економијата“, заклучи Ѓедовиќ Хандановиќ.
Директорот на „Србијагас“ Душан Бајатовиќ вчера оцени дека НИС моментално работи нормално и дека залихите на гориво во Србија се доволни за шест до осум месеци и дека нема опасност од ценовни шокови или недостиг на нафта.