Европската комисија го одобри преземањето на модната куќа Версаче од страна на Прада за 1,25 милијарди евра, јавува германската новинска агенција ДПА. Комисијата процени дека договорот не предизвикува загриженост за конкуренцијата.
Италијанскиот моден гигант Прада објави во април дека ќе ја купи италијанската модна куќа Версаче од американската група Капри Холдингс.
Новата италијанска модна група, која ќе ги обедини двете најголеми имиња во италијанската мода, ќе има повеќе од шест милијарди евра годишни приходи, објави тогаш француската новинска агенција АФП.
Версаче е во сопственост на Капри од 2018 година. Потоа американската групација плати вкупно 1,83 милијарди евра на семејството Версаче, кое поседуваше 80 проценти од компанијата, и на американскиот инвестициски фонд БлекРок, кој ги држеше преостанатите 20 проценти.
Сепак, поради падот на продажбата, таа одлучи да го продаде миланскиот моден бренд. Ексклузивните преговори со Прада започнаа кон крајот на февруари.
„Капри“, која ги поседува и модните брендови „Џими Чу“ и „Мајкл Корс“, беше принудена да се согласи да го продаде „Версаче“ со попуст поради пазарните притисоци предизвикани од американските царини. Како што објави британскиот „Фајненшл тајмс“ во април, првично се очекуваше да заработи 1,6 милијарди евра.
Првите големи промени во „Версаче“ беа навестени во март, кога Донатела Версаче се повлече од својата позиција како креативен директор по повеќе од 30 години. Таа ги црта модните упатства на компанијата од 1997 година, кога го наследи својот убиен постар брат Џани Версаче, основачот на модната марка.
Донатела Версаче е главен амбасадор на брендот „Версаче“ од април.