Цените на руската сурова нафта паднаа на најниско ниво од почетокот на војната во Украина, бидејќи санкциите дополнително ги продлабочуваат попустите што руските извозници мора да ги понудат, додека глобалните цени на нафтата исто така паѓаат.
Според „Аргус Медиа“, руските извозници добиваат просечно нешто над 40 долари за барел за нафта испорачана од пристаништата на Балтичкото и Црното Море, како и од источното пристаниште Козмино. Тоа претставува пад од 28 проценти во последните три месеци, а новиот бран ограничувања насочени кон нафтените гиганти „Роснефт“ и „Лукоил“ дополнително ги прошири попустите.
Зголемениот притисок од Западот врз руската трговија со нафта ја отежнува продажбата и испораките, а мерките се насочени и кон рафинериите во земјите кои се меѓу најголемите купувачи, како што е Индија. Во исто време, светските цени на нафтата паѓаат, па референтните фјучерси се тргуваат под 60 долари за барел, за прв пат од мај, пишува „Блумберг“.
Приходите од нафта и гас, кои сочинуваат околу една четвртина од државниот буџет на Русија, се клучни за финансирање на војната. Нивниот пад го оптоварува работењето на нафтените компании и ги намалува даночните приходи на државата.