Европскиот одбор за системски ризик (ESRB) предупреди дека банките во еврозоната би можеле да се соочат со тешкотии при финансирањето во странска валута на пазарот, особено во американски долари и други странски валути, доколку изразената геополитичка неизвесност се продолжи подолг временски период, пренесува Хина.
Објавувањето на извештајот на ESRB се совпадна со зајакнувањето на тензиите во односите меѓу Европа и САД оваа недела поради најавата на американскиот претседател Доналд Трамп дека САД имаат намера да го преземат Гренланд, автономна територија на Кралството Данска.
Гледајќи ги историските трендови, главниот супервизор за финансиски ризик на Европската Унија откри дека геополитичките шокови имаат тенденција да го намалат задолжувањето и меѓу банките и на пазарите на капитал, особено во странски валути.
Банките веројатно позајмуваат помалку бидејќи финансирањето на меѓународниот пазар станува поскапо во време на стрес, бидејќи купувачите на банкарски обврзници и други слични инструменти стануваат понесигурни кон ризик.
Студијата покажа дека поради шокот поврзан со неизвесноста на трговската политика, банките позајмувале помалку преку издавање должнички хартии од вредност деноминирани во странски валути, особено во американски долари и други странски валути.
Заемодавателите позајмувале помалку во странски валути и во услови на поизразен геополитички ризик и зголемена неизвесност на економската политика.
Анализата, исто така, покажа дека продажбата на банкарски обврзници и покриени обврзници била постабилна по шоковите, додека финансирањето преку хартии од вредност обезбедени со средства и хипотеки, како и краткорочен долг, било поранливо.
Неизвесната економска политика на САД ги тера банките да ја намалат понудата на кредити, откри ESRB. Во такви услови, кредиторите кои се најмногу изложени на САД ја намалуваат вкупната понуда на кредити за околу 4,5 проценти и ги зголемуваат каматните стапки за околу 0,9 процентни поени, покажа студијата на ESRB.
Резултатите од истражувањето упатуваат на заклучокот дека „долгорочниот период на неизвесност би можел да ги тестира границите на апсорпцијата на банкарското финансирање од страна на други банки и на пазарот на капитал, особено за инструменти деноминирани во странски валути“, заклучи ESRB.