Материјалната вредност на златниот медал се проценува на 2.100–2.200, а на сребрениот медал приближно 1.200–1.300 американски долари.
Зимските олимписки игри Милано – Кортина 2026 се во тек, а покрај спортските достигнувања, оваа година се руши уште еден рекорд – материјалната вредност на олимписките медали. Причината не е што медалите содржат повеќе злато. Количината на злато во голема мера останала непроменета со децении. Она што драматично се промени е цената на скапоцените метали.
Материјалната вредност на златниот медал во 2026 година го одразува неговиот состав, но и моменталните нивоа на цените на скапоцените метали на пазарот. Златниот олимписки медал тежи приближно 500 грама, но содржи само околу шест грама чисто злато, додека остатокот од масата е претежно сребро.
По пазарни цени од околу 5.000 американски долари за унца злато и 76 американски долари за унца сребро, материјалната вредност на еден златен медал се проценува на приближно 2.100-2.200 американски долари. Сребрениот медал, кој исто така тежи околу 500 грама и е целосно направен од сребро, има вредност од приближно 1.200 – 1.300 американски долари. Ова ги прави медалите од 2026 година највредни во историјата на современите Олимписки игри.
– Интересно е што количината на злато во олимпискиот медал речиси и да не се променила во текот на изминатиот век. Она што драматично се промени е самата цена на златото. Олимписките медали од оваа година се јасен пример за тоа како пазарната вредност на физичкото злато се претвора во реална, мерлива вредност – рече Георги Христов од компанијата „Тавекс“.
Само пред две години, за време на Летните олимписки игри 2024 во Париз, материјалната вредност на златниот медал беше приближно 900 – 1.000 американски долари. Денес, таа бројка е повеќе од двојно зголемена, што јасно го одразува силниот пораст на цените на златото и среброто.
Првите Зимски олимписки игри се одржаа во 1924 година во Шамони, Франција. Тогаш, златниот медал тежеше околу 55 грама и, слично на денешниот, содржеше приближно шест грама злато. Според тогашната официјална цена на овој скапоцен метал, само содржината на злато во медалот од 1924 година вредеше околу пет долари. Денес, истите тие шест грама злато вредат близу 1.000 долари.
Разликата не е во количината на злато, туку во неговата цена. За спортистите, олимпискиот медал е бесценет – резултат на години дисциплина, жртва и фокус. Сепак, зад симболите стои економска реалност: цената на скапоцените метали директно влијае на опипливата вредност дури и на најпрестижните светски награди.