„СпејсИкс“, во сопственост на Илон Маск, се подготвува за една од најочекуваните првични јавни понуди во историјата, а според достапните информации, проспектот за првичната јавна понуда (IPO) би можел да биде доставен до регулаторите оваа или следната недела.
Како што објавија странските медиуми повикувајќи се на извори запознаени со планот, компанијата би можела да собере повеќе од 75 милијарди долари во IPO-то, што би ја рангирало меѓу најголемите јавни понуди досега.
Според истите извори, значаен дел од акциите би можел да биде резервиран за мали, односно индивидуални инвеститори, при што се споменува удел поголем од 20 проценти, иако конечната структура на понудата сè уште не е дефинирана.
Досега, SpaceX официјално не ги потврди плановите за IPO, ниту одговори на медиумските прашања.
Аналитичарите проценуваат дека компанијата би можела да се насочи кон проценка од околу 1,7 трилиони долари, што веднаш би ја сместило меѓу најголемите компании во светот. Така, SpaceX значително би ги надминал претходните проценки од 2025 година, кога нејзината вредност беше околу 800 милијарди долари.
Доколку се реализира таква проценка, тоа би била една од најголемите јавни понуди во историјата на пазарот на капитал.
Иако конечната одлука сè уште не е донесена, Nasdaq се споменува како најверојатна берза за котација, делумно поради можноста за побрзо вклучување во индексот Nasdaq 100, што би им отворило врата на големите институционални инвеститори.
Дополнителен интерес на инвеститорите доаѓа од неодамнешното преземање на xAI, што ги проширува операциите на SpaceX надвор од вселенската индустрија во областите на вештачка интелигенција, сателитски интернет и инфраструктура за податоци.
Ова ја позиционира компанијата како технолошка платформа која обединува неколку брзорастечки сектори, што дополнително го зголемува нејзиниот инвестициски потенцијал.
Доколку плановите се реализираат како што се очекува, SpaceX би можел да ја одбележи 2026 година како една од најактивните на пазарот на IPO во последната деценија.