Проблемите во транзитот низ Персискиот теснец предизвикаа најголемо нарушување на глобалните текови на стоки во поновата историја, со сериозни последици за производството на храна, предупреди главниот економист на Агенцијата за храна и земјоделство на Обединетите нации (ФАО), Максимо Тореро.
Војната на Блискиот Исток веќе влијае на земјоделското производство и безбедноста на храната низ целиот свет, со последици за земјоделците и работниците мигранти, изјави Максимо Тореро на прес-конференција во седиштето на ОН во Њујорк.
„Секој момент сега е важен, а времето истекува, па затоа треба да се најде решение без одложување“, рече економистот на ФАО преку видео врска од Рим.
Пред војната, една петтина од нафтата и течниот природен гас минувале низ Ормутскиот теснец, според Меѓународната агенција за енергија (ИЕА). Транзитот вклучувал повеќе од 30 проценти од светските залихи на уреа и околу 20 проценти од залихите на азотни ѓубрива и фосфати, додадоа тие.
Прекините во транзитот дополнително го затегнаа веќе ограниченото снабдување со вештачки ѓубрива, со ризик од зголемување на цените на храната и можни проблеми во снабдувањето со прехранбени производи, предупреди ИЕА во средината на месецот.
„Тоа не е само енергетски шок, туку и системски шок што го чувствуваат земјоделските прехранбени системи низ целиот свет“, рече претставникот на ФАО.
Земјоделците, пишува Хина, во такви услови се соочуваат со „двоен шок“, зголемување на цената на ѓубривата и горивото, кои се клучни за производството.
Доколку наскоро се најде решение, пазарите би можеле да се стабилизираат во рок од три месеци, но доколку нарушувањата продолжат, „попесимистичките сценарија се сè поверојатни“, предупреди Тореро.
Среднорочното сценарио за тримесечна блокада покажува тежок удар за земјоделците низ целиот свет, а последиците би се прелеале и во следната сезона.