Европските акции пораснаа за повеќе од 3,5 проценти во среда наутро, бидејќи инвеститорите беа охрабрени од договорот меѓу САД и Иран за двонеделен прекин на огнот и наглиот пад на цените на нафтата.
Индексот STOXX 600 на водечките европски акции порасна за 3,7 проценти во 9:30 часот наутро.
Во исто време, лондонскиот индекс FTSE зајакна за 2,41 процент, на 10.598 поени, додека франкфуртскиот DAX скокна за 4,77 проценти, на 24.020 поени, а парискиот CAC порасна за 3,51 процент, на 8.186 поени.
Цените на акциите, исто така, силно пораснаа на азиските берзи. Индексот MSCI на акциите од Азиско-пацифичкиот регион порасна за околу 4 проценти во 9:30 часот наутро.
Во исто време, цените на акциите во Шангај, Австралија, Хонг Конг, Индија, Јапонија и Јужна Кореја пораснаа помеѓу 1,9 и 6,2 проценти.
Еуфоријата на пазарите е благодарение на договорот меѓу САД и Иран за двонеделно примирје, за време на кое двете земји ќе преговараат за условите за траен мир.
Американскиот претседател Доналд Трамп се согласи на ова во вторник вечерта, само неколку часа пред рокот што му го постави на Техеран да го отвори Ормутскиот теснец или САД ќе продолжат со жестоките напади врз Иран.
Благодарение на примирјето, американските фјучерси индекси силно пораснаа утрово. Во еден момент, Dow Jones, S&P 500 и Nasdaq скокнаа за повеќе од 2 проценти, а моментално се во пораст за околу 1,5 проценти.
Тоа најавува силен пораст на цените на акциите на Волстрит во среда.