Помалку од една петтина од крипто компаниите ја обезбедија потребната лиценца пред крајниот рок, додека Брисел ја воведува најстрогата регулаторна рамка во историјата на европската индустрија за дигитални средства.
Европската крипто индустрија навлегува во можеби најважниот период од раѓањето на биткоинот. Од 1 јули, регулативата MiCA (Markets in Crypto-Assets -Пазари во крипто-средства), првата сеопфатна регулаторна рамка за криптовалутите во Европската унија, стапува во целост, а последиците би можеле да бидат драматични за голем дел од пазарот.
Според податоците од Европскиот надзорен орган за хартии од вредност и пазари на капитал (ESMA), до мај, само околу 210 компании ја добиле потребната MiCA лиценца, иако досега повеќе од 1.200 крипто компании работеле врз основа на национални регистрации. Ова значи дека помалку од една петтина од учесниците на пазарот успешно го поминале регулаторниот процес пред крајот на преодниот период.
Уникатни правила
Од јули, нелиценцираните крипто берзи, брокери и даватели на дигитални паричници ќе мора да престанат да им служат на европските клиенти или да ги затворат своите операции. Регулаторите веќе предупредија дека продолжувањето на работата без одобрение може да резултира со казни, регулаторни мерки, па дури и кривични постапки во одредени земји-членки.
MiCA претставува обид на Брисел да создаде единствен европски пазар на крипто средства моделиран според традиционалниот финансиски сектор. Наместо 27 различни национални режими, компаниите во иднина ќе работат според униформни правила што ги регулираат капиталните барања, заштитата на средствата на корисниците, корпоративното управување и спречувањето на перење пари. Откако ќе се добие лиценцата, таа ќе овозможи бизнис на целиот пазар на Европската Унија.
За најголемите играчи, новите правила претставуваат можност. Coinbase веќе обезбеди одобрение во Ирска, Kraken во Ирска и Луксембург, додека Revolut е лиценциран во Кипар. Бидејќи нелиценцираните конкуренти го напуштаат пазарот, лиценцираните компании би можеле да ги преземат нивните корисници и дополнително да ги консолидираат своите позиции.
Проблеми за помалите компании
Од друга страна, дел од индустријата предупредува дека трошоците за усогласување со новите правила се превисоки за помалите компании. Токму затоа многу аналитичари очекуваат бран на консолидација во кој помалите даватели на услуги ќе исчезнат или ќе станат зависни од поголемите, лиценцирани платформи.