Во вториот квартал од 2026 година, просечната цена на земјоделските производи во Европската Унија се намали за 5,8% во споредба со вториот квартал од 2025 година. Тоа беше трет последователен квартал во кој е забележан пад.
Просечната цена на земјоделските инпути (стоки и услуги што се користат во земјоделството и не се поврзани со инвестиции, како што се извори на енергија, ѓубрива или храна за животни) се зголеми за 4,7% во вториот квартал од оваа година. Ова следеше по период на релативна стабилност на цените во текот на 2025 година до првиот квартал од 2026 година, соопшти Евростат.
Во вториот квартал од 2026 година, намалување на просечната цена на земјоделските производи на годишно ниво е забележано во 20 земји од ЕУ. Најголем пад е забележан во Данска (-17,2%), Ирска (-16,2), Латвија и Естонија (и двете -14,5), како и Луксембург и Литванија (и двете -14,2). Најголем раст е забележан во Хрватска и Малта (+3,9 проценти секоја) и Кипар (+3,5).
Спротивно на тоа, просечната цена на инпутите кои не се поврзани со инвестиции се зголеми во сите земји од ЕУ. Најбрз раст е забележан во Литванија (+16,4%), Романија (+11,7) и Латвија (+9,7). Најбавен раст е забележан во Унгарија и Португалија (+1,2% секоја) и Малта (+1,5).
Меѓу клучните земјоделски производи, имаше остар пад на просечната цена на млекото во ЕУ (-16,6% помеѓу вториот квартал од 2025 и 2026 година) и житарките (-5,6). Меѓу клучните стоки и услуги што се трошат во земјоделството, просечната цена на енергијата и лубрикантите во ЕУ се зголеми за 22%, а цената на ѓубривата и подобрувачите на почвата за 13,4%.