Германските компании значително ги зголемија своите инвестиции во Кина во првата половина од годината, според истражувањето на Германскиот економски институт (IW).
Во периодот од јануари до јуни, германските компании инвестирале околу 5,6 милијарди евра во Кина, што е приближно една третина повеќе отколку во истиот период минатата година, заклучија експертите на IW врз основа на анализа на податоците од германската централна банка.
Годишната споредба покажува силен раст, но износот е всушност на ниво на просекот во периодот од 2020 до 2025 година, истакнуваат тие во истражувањето.
„Германските компании немаат друг избор освен да продолжат да инвестираат во Кина“, рече економистот на IW, Јирген Матес, истакнувајќи дека азискиот гигант е важен пазар, но и „фитнес центар“ за конкурентност.
Сепак, производството во Кина е „вештачки“ евтино, бидејќи државата ги субвенционира компаниите, а вредноста на јуанот се одржува на ниско ниво, така што кинеските стоки во странство се евтини.
„Кој сака да преживее во жестоката глобална ценовна конкуренција во конкуренцијата со кинеските компании, мора да произведува повеќе таму и да има корист од нарушената пазарна конкуренција“, забележува Матес.
„За Германија, ова значи дека производството и работните места се селат во Кина“, предупреди Матес, посочувајќи дека ЕУ треба да престане со „таа нефер игра“ и да воведе компензаторни давачки за увоз на стоки од Кина.