Во земјите од Европската Унија, најтешко е да се најде кадар во областите образование, здравство и информатичка технологија (ИТ).
Полесно е да се најдат работници за поедноставни физички задачи или помагачи во подготовката на храна, според објавените податоци од Организацијата за економска соработка и развој (ОЕЦД).
Овие недостатоци се присутни и во време кога младите се соочуваат со сè поголеми барања на пазар на трудот, а ОЕЦД откри дека во анализираните земји, разликата во стапката на невработеност помеѓу младите луѓе кои завршиле образование и општото население на работоспособна возраст е зголемена, објавува „Еуроњуз“.
Европската централна банка (ЕЦБ) исто така наведува дека, почнувајќи од 2023 година, перспективите за вработување на младите во Еврозоната се влошиле.
Според извештајот на организацијата насловен како „Мапирање на јазот во вештините во земјите на ОЕЦД“, професијата наставник, во просек, е најтешка за наоѓање персонал.
Следно се здравствените работници, како и експертите од областа на информатичките и комуникациските технологии (ИКТ), а меѓу петте занимања за кои е најтешко да се најде персонал се здравствените соработници како што се медицинските техничари и медицинските сестри, како и експертите од областа на бизнисот и администрацијата.
Од друга страна, најлесно се наоѓаат физички работници, асистенти за подготовка на храна, продавачи и работници во монтажа.
Зошто е сè потешко да се најдат наставници и медицински лица?
„Недостатокот на наставници повеќе не е само прашање на пополнување на слободните работни места, туку сè повеќе станува збор за долгорочна привлечност и одржливост на наставничката професија“, изјави Даниел Вишњевски, генерален секретар на Европската федерација на работодавачи во образованието, за Eуроњуз.
Тој тврдеше дека причините за недостатокот на наставници одат подалеку од прашањето на платите, иако тие остануваат многу важен фактор. Наставничката професија стана сè посложена, со бројни барања што произлегуваат од воведувањето дигитални алатки во училиштата и создавањето поинклузивна средина во училницата.
Кога станува збор за здравствениот сектор, претседателот на Постојаниот комитет на европските лекари (CPME), Оле Јохан Баке, посочи на влошувањето на условите за работа во таа област.
„Од лекарите низ Европа се очекува сè повеќе да го компензираат системскиот недостиг на работна сила преку прекумерни работни часови и зголемен обем на работа“, рече тој.
Зголемена побарувачка за ИТ професионалци
Економистката во ОЕЦД, Изабел Скак Олуфсен, изјави дека дигитализацијата ја зголемила побарувачката за ИТ специјалисти.
Сепак, таа додаде дека напредокот во вештачката интелигенција би можел да ја намали побарувачката за одредени ИТ профили во иднина, особено позициите на почетно ниво.
Портпаролката на Европското тело за труд (ELA), Пија-Јохана Фалстрем, изјави дека недостигот на работна сила во Европа сè повеќе добива структурен, а не привремен карактер.
„Демографските промени, несовпаѓањето на вештините, квалитетот на работните места и ограничената мобилност на работната сила играат улога“, истакна таа.
Фалстрем истакна дека на Европа ѝ е потребна подобра обука, работни места со подобри услови за работа, како и подобро усогласување на вештините на работниците со потребите на работодавачите.