Технолошкиот гигант Apple вчера го организираше долго очекуваниот настан во Сан Франциско, на кој првиот човек на компанијата, Тим Кук ги претстави iPhone 6 и iPhone 6 Plus, како и првиот паметен часовник под името Apple Watch.
Новиот iPhone доаѓа со нов Retina HD екран, а позадината на овој мобилен телефон е изработена од алуминиум. iPhone 6 е со екран од 4,7 инчи, а iPhone 6 Plus со 5,5 инчи. Резолуцијата е 1920 х 1080 пиксели, додека неговата дебелина е 6,9 милиметри, а на iPhone 6 Plus e 7,1 милиметри.
Во овие мобилни уреди е вграден процесор А8 кој е за 13% помал од А7 и кој нуди за 25% подобрени перформанси, а е дури 50 пати побрз од процесорот што го имаше првиот iPhone. Енергетската ефикасност на процесорот А8 е 50% подобра за разлика од претходната генерација процесори. Графичките перформанси се 84 пати подобри за разлика од оние на првиот iPhone.
Камерата има резолуција од осум мегапиксели, True Tone блиц и f/2 бленда. Предната – selfie камера прима 81% повеќе светлина за разлика од претходниот iPhone.
Батеријата на iPhone 6 “држи“ 14 часа разговори преку 3G мрежата, додека на iPhone plus 24 часа. На iPhone 6 батеријата на stand by трае 10 дена, а на поголемиот модел 16 дена.
Цената, со двегодишен договор во САД за iPhone со меморија од 16, 64 и 128 GB, ќе биде од 199, 299 и 399 долари. Од 19 септември ќе може да се купи само во неколку земји, а до крајот на годината ќе биде достапен во 115 земји ширум светот. Цената на iPhone 6 Plus е за 100 долари поголема во зависност од меморијата на мобилниот телефон.
Apple Watch, пак, е замислен како часовник кој воедно е и уред за фитнес и следење на здравјето. Паметниот телефон има сафирно стакло, а копчето од десната страна се нарекува Digital Crown. Станува збор за своевидно Home копче, но и за зумирање на приказот на екранот. Под него се наоѓа уште едно копче со кое се активира листата на контакти.
Екранот на овој паметен телефон разликува допир и притисок. Во самиот телефон има вградено читач на пулс, жироскоп, акцелерометар… Ќе биде достапен со шест различни ременчиња и механизам што овозможува нивна замена. Ременчињата ќе бидат кожни, метални, пластични.
Со овој часовник неопходно е да се користи iPhone. Корисничкиот интерфејс е замислен како “центар на вселената“, а со зумирањето се влегува во различни “соседства“ преку апликациите.
Цената на часовниците започнува од 349 долари, а може да функционира со iPhone 5 и со најновиот модел, а ќе биде достапен на почетокот на 2015 година.
