Поради увезеното брашно домашното остана непродадено

Мелничарите во Македонија се загрижени за својот опстанок откако Владата ја укина одлуката за условен увоз на брашно со претходен откуп на домашна пченица.

Како што и самите истакнаа на денешниот состанок во Стопанската комора, тие имаат огромни залихи поради тоа што во земјава најмногу се продава увезеното брашно од Србија, кое е поевтино за шест до девет денари од домашното.

Според претседателот на Групацијата на мелничко-пекарската индустрија во Комората, Николчо Георгиев од Макмлин, ако не се преземат соодветни мерки, годинашната пченица чие производство споредено со лани е поголемо за 20%, ќе остане неоткупена.

“Досега имавме разбирање од Владата и секогаш и излегувавме во пресрет, особено за време на жетвата. Очекувавме мерката што беше укината на 1 ноември 2012 да трае до Нова година или најдоцна до март 2013”, нагласи Георгиев.

Преработувачите ќе бараат поголема контрола на увезеното брашно и воведување маркички за произведено декларирано и увезено брашно.

Според последните податоци од Стопанската комора од 1 ноември 2012, кога се укина владината заштитна мерка, па се до денес, увезени се 12.000 тони пченично брашно главно од Србија, но се смета дека брашно се увезува и од Косово и БиХ.