Десет години по смртта на Стив Џобс, Apple се трансформираше во екосистем на уреди и услуги, поскапи од која било друга компанија во светот, но ја загуби „аурата“ на иновации својствена за својот легендарен основач.
„Тим Кук повеќе не е Стив Џобс“, „Apple повеќе не е иноватор“, „Стив Џобс се превртува во гробот“, и слични коментари има на Твитер, особено во време кога Тим Кук, кој ја презеде компанијата во август 2011 година, промовира нови производи.
Очигледно, стилот на Стив Џобс, кој почина на 5 октомври 2011 година, е зачуван. Секој нов производ е претставен свечено, во атмосфера на тензично исчекување.
Секој ден „Д“, без разлика дали станува збор за техничко подобрување, нова серија „iPhone-и“ кои стануваат се пософистицирани, нова услуга за видео стриминг или само нова боја на телото, Тим Кук и неговите соработници настапуваат исто помпезно и со еднаков ентузијазам.
Но, без Стив Џобс, „Apple ја загуби способноста да лансира производи што го револуционизираат пазарот“, тврди независниот аналитичар Роб Ендерле. „Тие станаа финансиска компанија, добро подмачкана машина која знае како да ги „цица“ своите лојални потрошувачи“.
Компанијата, која го започна својот подем во гаража во Силиконската долина во 1976 година, го промени секојдневниот живот на стотици милиони луѓе со своите компјутери, додатоци и уреди како што се „iPod“ (2001), а особено iPhone (2007).
Визионерот Стив Џобс двапати ја потресе информатиката: графичките интерфејси се наметнаа во 1980 -тите како метод за комуникација помеѓу машините и луѓето. Паметните телефони го ставија интернетот во џебот на секој поединец.
Кога следи 3 -та револуција?
Оттогаш, Apple го претстави паметниот часовник Apple Watch.
„Карактеризацијата на Apple отсекогаш била иновација и тоа е важно (…), но има и други критериуми, како што е способноста на компанијата да се трансформира“, смета аналитичарот Каролина Миланези.
Гигантот од Купертино го збогати својот асортиман со додавање на голем број нови услуги прецизно интегрирани во уреди: музика, плаќање, видео, игри, спорт…
„Apple денес има повеќе жици на својот инструмент што му овозможува да свири подобро и да привлече нови корисници и да ги сочува“, вели експертот од Creative Strategies.
Таквата стратегија сигурно не би била отфрлена и од самиот Стив Џобс, кој отсекогаш се обидувал да го поедностави и контролира потрошувачкото искуство од А до Ш, како што пишува Волтер Исаксон во својата биографија.
Ниту Apple ниту која било друга компанија не донесе револуција во дигиталниот свет во последните десет години. Но, култот кон „јаболкото“ е сe уште жив и го притиска Тим Кук и денес.
Но, многу аналитичари веруваат дека Колосот од Калифорнија и денес носи пронајдоци.
„Тие се и денес иновативни. Напишано е во ДНК-то на таа компанија и мислам дека Стив Џобс би бил горд “, рече Ден Ајвс, наведувајќи го развојот на чипот М1, кој го заменува процесорот на Intel во некои нови уреди.
„iPhone ќе продолжи да биде срцето и белите дробови на растот на Apple со текот на годините. (…) Ќе ги видиме и очилата за виртуелна реалност на Apple и автомобилот на Apple од 2024 година“, тврди Ајвс.
Наскоро 3.000 милијарди?
Како и да е, методите на Тим Кук го воодушевуваат Волстрит: пред десет години, Apple вредеше околу 350 милијарди долари, а на 1 октомври 2021 година, вредноста достигна 2,358 милијарди долари.
„За 6 до 9 месеци, ќе достигне 3.000 милијарди долари“, предвидува Ден Ајвс.
Недостатокот на микрочипови низ целиот свет се чини дека не влијаеше врз капацитетот на компанијата да ги исполни барањата на пазарот. Компромисната политика на Apple кон приватниот живот во Кина само ги налути критичарите.
Понатаму, групата Apple до денес беше релативно поштедена од тужби во областа на авторските права и сродните права, за разлика од Google и Facebook кои беа казнети со огромни суми.
Американски судија неодамна ги отфрли тужбите за монопол поднесени од издавачот на видео игри Epic Games, откако Apple го отстрани Fortnite од App Store.
Во оваа област, како и во борбата против педопорнографијата, Тим Кук води политика на минимални отстапки, во стил што силно отстапува од тој на Џобс, познат по бурните реакции.
„Во последните десет години, стилот на Стив JЏобс не опстана“, вели Каролина Миланези, потсетувајќи на тешкиот карактер на покојниот Џобс.
„Мислам дека Тим Кук е подобар извршен директор за денешното општество“, додава таа.
