Белградската берза денеска (05.12.2016) стана активен член на SEE Link мрежата, откако на почетокот на оваа година аплицираше за вклучување на оваа платформа.
Белградската берза е прва што активно се приклучува кон SEE Link, по трите берзи основачи на платформата.
“Оперативното приклучување на SEE Link платформата е значаен ден за идниот развој и позиционирање на Белградската берза и нашиот регион. На овој начин, берзата сака националниот и регионалниот пазар на капитал да ги направи комплементарен сегмент за финансирање на развојот на приватниот сектор, од една страна, и атрактивно подрачје на мапата на инвестирање, од друга страна. Со ова остануваме целосно посветени на создавањето силно, а во нашиот регион се уште недостижни врски на реалниот сектор и пазарот на капитал“, изјави Синиша Крнета, директор на Белградската берза.
SEE Link е проект на Софиската, Загрепската и Македонската берза, со цел да се креира регионална инфраструктура за тргување на хартиите од вредност коишто котираат на овие три берзи.