Британската компанија Ендава ИКТ ќе отвори 450 нови работни места

Новата странска инвестиција, британската Ендава ИКТ компанија со седиште во Лондон, за развивање софтвери, во Република Македонија ќе отвори нови 450 работни места во наредните три до четири години, а во првата фаза ќе инвестира над два милиони евра.
Џон Которел, извршен директор на британската Ендава, по денешната средба со премиерот Никола Груевски изрази исклучителна благодарност до Владата и другите институции и ИТ компании во земјава за поддршката и нивниот голем интерес за проширување на овој бизнис во Република Македонија.
“Од 40 градови во Европа го избравме Скопје затоа што постои брз раст на ИТ секторот, забрзаниот економски раст и високообразованиот кадар”, рече извршниот директор Которел.
Британската Ендава, која работи на развој на софтвери за најдобрите 500 мултинационални компании од листата на ФОРТУНЕ од банкарскиот, телекомуникацискиот и осигурителниот сектор, отвора во првата фаза дистрибутивен центар за изработка на софтвери и во Скопје. Се планира и раст на инвестициите, како и нови центри во други градови како што е Штип и Тетово, места каде што има ИТ факултети.
Британската компанија Ендава има свои канцеларии во Франкфурт, Њујорк, Атланта Галзгов, Оксфорд, Романија и Молдавија.