Американскиот претседател Доналд Трамп изјави дека во текот на изминатите два дена имал разговори со иранските претставници и дека тие биле конструктивни и продуктивни. Како што изјави, поради позитивниот тон на преговорите, тој ѝ наредил на американската војска да ги одложи планираните напади врз енергетската инфраструктура на Иран за пет дена, со услов разговорите да продолжат успешно во текот на неделата.
Според него, целта на преговорите е можноста за целосен прекин на конфликтот на Блискиот Исток, а одлуката за одложување на ударот е донесена токму за да се даде простор на дипломатијата, објавува Комерсант.
„Имавме многу добри и продуктивни дискусии за можноста за целосен прекин на непријателствата на Блискиот Исток од наша страна. Со оглед на природата и тонот на тие дискусии, суштински, детални и конструктивни, кои ќе продолжат во текот на целата недела, му наредив на Пентагон да ги одложи сите воени напади врз иранските електрани и енергетска инфраструктура за пет дена, под услов тековните состаноци и преговори да бидат успешно завршени“, рече Трамп во објава на социјалната мрежа Truth Social.
Да потсетиме дека на 21 март, Трамп му постави ултиматум на Иран повторно да го отвори Ормутскиот теснец во рок од 48 часа, заканувајќи се во спротивно со напади врз енергетските постројки. Техеран одби и рече дека ќе возврати, сметајќи ја енергетската инфраструктура на околните земји, ИТ постројките и постројките за десалинизација на вода во САД и Израел како легитимни цели. Иранските власти, исто така, се заканија дека ќе го минираат Персискиот Залив во случај на копнена операција на САД.
Во меѓувреме, пазарот на нафта се смири по веста за разговорите. Цената на нафтата од типот Брент забележа пад од повеќе од 11 проценти околу пладне, но потоа постепено повторно порасна. Претходно, цените нагло пораснаа поради страв од ескалација на конфликтот и можно нарушување на испораките преку Ормутскиот теснец. ВТИ во моментот на пишување на текстот се тргува по цена од 88, 54 долари за барел, а Брент за 100,3 долари.