Француската група Данон соопшти дека се повлечени некои млечни производи од романскиот пазар. Причина за тоа е што во млекото на еден од добавувачите во оваа земја е откриено повисоко ниво на афлатоксин од дозволеното.
Од компанијата соопштија дека поради претпазливост се блокирани 75 тони производи, за кои постои сомневање дека биле во контакт со контаминираното млеко. Афлатоксинот во млекото е резултат на тоа што кравите биле хранети со мувлосана храна.
Данон има договори со 80 компании во Романија, од каде се снабдува со различни количини на млеко.
Претходно Романија беше во центарот на случувањата, кога во маркетите во неколку земји во Европа беа откриени производи кои наместо говедско, содржеа коњско месо, наводно увезено од Романија.
