Фотоволтаичните системи користат технологија за производство на електрична енергија од сончева енергија, стои во брошурата Потрошувачи да произведуваме и трошиме зелена електрична енергија од Организација на потрошувачите на Македонија.
Овој систем користи ќелии за претворање на сончевото зрачење во електрична енергија. За да работи системот, му треба дневна светлина и пристап до сончевото зрачење. Сè додека нема сенки на сончевите панели, и се поставени под соодветен агол, тие ќе можат да произведуваат електрична енергија.
Меѓу 10-те причини поради коишто треба да се инвестира во фотоволтаичен систем се:
- Ниски трошоци за работа
- Не ја загадува животната средина
- Безбеден е
- Инвестицијата се отплаќа за пет до 10 години
- Модулите на системот може да се рециклираат
- Бара минимално одржување
- Произведува струја, без разлика на географска локација
- Може да биде естетски интегриран во обвивката на зградата
- Се смета за еколошки и “зелен“
- Го намалува јаглеродниот отпечаток и помага во борбата против глобалното затоплување
Овој систем, како што се наведува во брошурата, може да ги покрива потребите од електрична енергија во домаќинството, како осветлување, кујнски апарати и електронски апарати (компјутер, телевизор и радио). Во зависност од инсталираниот капацитет, системот може да покрива дел од оптоварувањата за греење и ладење, ако е правилно проектиран и во комбинација со електрично напојување од мрежа и акумулација во батерии може да постигне покривање на дневните потреби за струја.
Заштедите со фотоволтаичниот систем зависат од димензиите и видот на инсталираниот систем, како и тоа што го заменува системот. Со типичен 2 kWp систем, ако е правилно проектиран и ако во просторот се спроведени мерки за енергетска ефикасност за намалување на потрошувачката на струја, тогаш би требало сметката за електрична енергија да се преполови.
Фото: Pexels
