Директор отпуштил 90 отсто од вработените бидејќи вештачката интелигенција е 98 отсто поефикасна од нив

42

Извршниот директор на технолошки стартап се соочи со критики откако отпушти 90 отсто од вработените и се одлучи за чет-бот со вештачка интелигенција.

Ова е потег што ја нагласува зголемената загриженост за губење на работните места бидејќи автоматизацијата продолжува да ги преобликува сите области на индустријата.

Сумит Шах, извршен директор на индискиот технолошки стартап  Dukaan, донесе одлука да отпушти 90 отсто од вработените за поддршка на компанијата во корист на чет-бот напојуван со вештачка интелигенција.

Шах објасни дека чет-ботот, развиен од еден од научниците за податоци на компанијата, дава моментални одговори на првичните прашања, додека на човечкиот персонал му биле потребни во просек една минута и 44 секунди.

Тешка, но неопходна одлука: драстично подобрени резултати

Шах призна дека било тешко да се дадат отказите, но неопходно, како одраз на зголеменото присуство на вештачката интелигенција во различни индустрии и како резултат на несигурноста за безбедноста на работата.

Имплементацијата на чет-ботови резултирала со значително намалување на времето потребно за решавање на проблемите со клиентите. Во просек, времето за решавање на проблемот се намалило за речиси 98 отсто, од 2 часа и 13 минути на само 3 минути и 12 секунди.

Во објава на Твитер, Шах ја нагласи важноста да ѝ се даде приоритет на профитабилноста. Тој изјави дека отпуштањата ги намалиле трошоците за поддршка на клиентите за приближно 85 отсто, со што се решил долгогодишниот проблем за неговата компанија.

Тој го изрази своето верување за иднина во која вештачката интелигенција и луѓето ќе работат заедно и изрази интерес за истражување на потенцијалот на вештачката интелигенција во други области на бизнисот.
Веб-страницата на  Dukaan покажува дека компанијата сè уште активно има огласи за повеќе позиции, вклучувајќи инженерски, маркетинг и продажни позиции.

Сепак, неговата твитер-објава наиде на различни реакции, при што многу корисници изразија незадоволство од неговиот пристап, особено поради значителните загуби на работни места. Критичарите ја опишаа објавата како недостиг на емпатија и непочитување на оние што биле отпуштени.

Одлука во согласност со светскиот тренд

Одлуката на оваа компанија да го замени персоналот со вештачка интелигенција е во согласност со трендот бидејќи многу компании се одлучуваат за автоматизација. Во извештајот на Светскиот економски форум се предвидува дека до 2027 година вештачката интелигенција ќе доведе до губење на 83 милиони работни места. Улогите со мала емоционална вклученост и крути структури засновани на правила, како што се аналитичарите, софтверските инженери и сметководителите, се очекува да бидат најмногу изложени на ризик.

Експертите издадоа уште поалармантни предупредувања посочувајќи дека ботовите би можеле да заменат 80 отсто од кариерите на луѓето во наредните години бидејќи компаниите бараат конкурентска предност. Влијателни личности како Илон Маск и Стив Вознијак повикаа на пауза во развојот на вештачката интелигенција, потпишувајќи отворено писмо со барање за пауза од шест месеци.

Друг значаен развој дојде кога пионерот на вештачката интелигенција Џефри Хинтон, наречен “кум“ на вештачката интелигенција, го напушти Гугл предупредувајќи на потенцијалните опасности од вештачката интелигенција, споредувајќи ја со атомска бомба.