Извршниот директор на „Џеј Пи Морган Чејс“, Џејми Дајмон, изјави во средата на Светскиот економски форум во Давос дека банката веројатно ќе има помалку вработени во следните пет години поради брзиот развој на вештачката интелигенција. Како што рече, вештачката интелигенција не само што ќе го трансформира начинот на работа, туку ќе доведе и до исчезнување на голем број работни места, иако е можно истовремено да отвори и некои нови работни места.
Дајмон предупреди дека темпото со кое се развива вештачката интелигенција може да ја надмине способноста на општеството за прилагодување, поради што тој верува дека е неопходна соработка меѓу владите и бизнис секторот. Според него, ќе бидат потребни програми за преквалификација, поддршка за преселување и финансиска помош за луѓето кои ги губат своите работни места, со цел да се избегнат последици слични на големите бранови на невработеност од минатото, пренесува Ројтерс.
Зборувајќи за геополитиката, Дајмон истакна дека сака посилно НАТО и посилна Европа, бидејќи тоа го гледа како клуч за зачувување на единството на западниот свет. Тој оцени дека Соединетите Американски Држави денес се помалку сигурен партнер отколку порано и призна дека не е сосема јасен за целите на надворешната политика на администрацијата на американскиот претседател Доналд Трамп.
Осврнувајќи се на глобалните односи, Дајмон рече дека би било претерување да се тврди дека Кина значително профитирала од тензиите меѓу САД и Европа, иако призна дека одредени можности се отвориле за Пекинг. Сепак, тој процени дека Кина веројатно нема да успее да формира поширока коалиција од земји кои се незадоволни од американската политика.