Хотелот DoubleTree by Hilton Skopje, најновиот во синџирот луксузни хотели на реномираниот бренд, од први јануари, официјално почнува со работа и ќе ги пречека првите гости, стои во соопштението.
Лоциран покрај кејот на реката Вардар близу мостот Близнак во општина Аеродром, објектот се простира на пет ката со едно подниво и зафаќа површина од 25.000 метри квадратни.
За врвна услуга и топло гостопримство, Хилтон става на располагање 170 соби, 15 апартмани од кои еден претседателски од 260 метри квадратни, Euphoria Welness & SPA модерен спа и фитнес центар од 1.400 метри квадратни, традиционална турска бања, сауна, џакузи и затворен базен, како и најмодерната Life Fitness опрема за вежбање, шест конференциски сали, една сала за свечености Diamond Ballroom, три ресторани.
Хотелот располага со сопствен затворен паркинг простор за 150 возила, како и отворен паркинг за 200 возила. Хотелот нуди панорамски поглед на градот, а за беспрекорен престој на гостите ќе се грижат близу 200 вработени.
На објектот интензивно се работеше две години и освен што е импозантен однадвор, енергетски и еколошки е ефикасен и има врвно хортикултурно уредување. Целосната инвестицијата е вредна 50 милиони евра.
Еден од лидерите во хотелиерската индустрија, Хилтон досега беше присутен во 109 држави со вкупно 5.500 хотели и во својата стогодишна историја има пречекано повеќе од три милијарди гости. Новата 2019 ја почнува додавајќи ја и Македонија на својата мапа, со најубавиот DoubleTree by Hilton хотел во светот.
